Capt Moussa Dadis Camara wahoze ari Perezida w’Igihugu cya Guiena, yakatiwe n’Urukiko rwo muri icyo gihugu gufungwa imyaka 20, nyuma yo guhamwa n’ibyaha birimo ibyibasiye ikiremwamuntu ndetse akanaba inyuma y’ubwicanyi bwakozwe n’igisirikare bugahitana abantu basaga 156 ndetse n’abagore benshi bagafatirwa ku ngufu muri Stade i Conakry. https://wp.me/pdC7Oe-82Z

Capt Camara wahoze ari umutegetsi wa gisirikare, yari akurikiranweho kuba ari we watanze amabwiriza ku basirikare bakoze ayo mahano mu mwaka wa 2009, icyakora ntiyahwemye guhakanira Urukiko ko ibyo ashinjwa nta sano afitanye nabyo ko bishingiye kuri Politiki nk’uko binashimangirwa n’Umwuganizi we mu mategeko.

Mu 2008 ni bwo uyu mugabo yafashe ubutegetsi ahiritse Perezida Lansana Conté wari umaze igihe kinini apfuye. Mu gihe uyu muyobozi ufatwa nk’umunyagitugu yavuye ku butegetsi ku wa 15 Mutarama 2010. Icyakora nyuma y’aho yaje guhungira mu gihugu cya Burkina Faso aza gukurwayo muri Nzeri 2022, kugira ngo akurikiranwe n’ubutabera, yakunze kuvuga kenshi ko ari umwere.

Uyu mugabo we na bagenzi be barindwi bahamwe n’ibyaha byo kwica, ihohotera rishingiye ku gitsina, iyicarubozo no gushimuta abantu, bahita bahanishwa gufungwa imyaka 20 ni mu gihe batatu aribo bagizwe abere. Kuri ubu iki gihugu cya Guinea Conakry kiyobowe na Colonel Mamadou Doumbouya kuva igisirikare cyahirika ubutegetsi bw’uwari Perezida muri Nzeri 2021. https://wp.me/pdC7Oe-82T