Uwahoze ari Umunyamabanga wa Leta Zunze Ubumwe za Amerika wungirije ushinzwe umugabane wa Afurika, Herman J. Cohen yatangaje ko Perezida wa Congo Felix Antoine Tshisekedi adakwiye kurahizwa nk’Umukuru w’Igihuku muri manda ye ya kabiri “kuko yibye amajwi.”

Uyu wari Umuyobozi ukomeye yabitangaje abinyujije ku rubuga rwa X, nyuma y’uko asomye raporo y’Inama y’Abepisikopi bo muri RDC (CENCO) yagaragaje ko amatora yabaye ku wa 20 Ukuboza 2023 yaranzwe n’inenge nyinshi ndetse n’ubujura bw’amajwi ku rwego rwo hejuru, yahereye kuri ibi avuga ko Tshisekedi arahiye kuyobora manda ye ya kabiri byaba bikozwe mu buryo bunyuranyije n’itegeko.

Mu butumwa bwe yagize ati “ Amatora ya Perezida yo muri Repubulika Iharanira Demokarasi ya Congo yabaye ku wa 20 Ukuboza 2023, yaranzwe n’inengendetse nubujura bw’amajwi nk’uko bivugwa muri raporo y’Inama y’Abepisikopi Gatolika (CENCO). Ku bw’ibyo, Perezida Tshisekedi ntabwo akwiye kurahizwa kubera ko Perezidansi ye yaba itemewe.”

N’ubwo uyu muyobozi avuze gutya, CENI mu majywi yashyize hanze mu buryo bw’agateganyo agaragaza ko Tshisekedi yatsinze amatora ku majwi 73%. Aya matora yabaye muri RDC ntiyakunzwe kuvugwaho rumwe kuko abnshi mu bakandida bashinja Denis Kadima ukuriye CENI ko yaba yaribiye Tshisekedi amajwi.

Kugeza ubu ni bake beruye bakavuga ko Tshisekedi yatsinze amatora nyuma y’imvururu zabaye ku munsi ariya matora yabereyeho mu bice bimwe na bimwe muri kiriya gihugu. Biteganyijwe ko Tshisekedi ku wa 20 mutarama 2024 azarahira manda ye ya kabiri nyuma y’uko bitangajwe ko ari we watsindiye kuyobora igihugu.