Uwimpundu Sandrine, umukinnyi wa filime nyarwanda wamenyekanye cyane muri filime y’Umuturanyi Series nka Rufonsina yasobanuye icyamuteye kugaragaza amabere ye no konsa abana batari abe mu mashusho ya filime iheruka kujya hanze yitwa ‘The Forest’.

Ubwo aya mashusho y’iyi filime yasohokaga, abantu benshi babinyujije ku mbuga nkoranyambaga  batangiye kuvuga ko bitari bikwiye. Nyamara Rufonsina avuga ko ubuhanga bw’utunganya amashusho bwatumye abigaragaza uko babyifuza ariko bikaba bihabanye n’ukuri.

Ubwo Rufonsina yaganiraga n’umunyamakuru Murindahabi Irene, yavuze ko bageze ku ntego yabo bifuzaga, kuba benshi baratangajwe n’icyo kintu kitashoborwa n’umwari uwo ari we wese mu mwuga wa filime. Rufonsina yongeyeho ko amabere ye atagiye hanze cyane bikabije kuko imoko itigeze igaragazwa muri filime.

Rufonsina yagize ati “Niyo mwabona imoko, murabizi ko hari abakina ibirenze ibyo, ariko njye narindi konsa abana gusa”. Yakomeje agira ati “Ntabwo abakinnyi bose twumva ibintu kimwe! Ariko ku giti cyanjye numva ko umukinnyi mwiza ibyo asabwa gukora byose mu gihe abishoboye yabikina.”

Iyi Filime yitwa The Forest inyura ku rubuga rwa Youtube, yanditswe n’umukinnyi uri kuzamuka witwa Soloba.