Fabos Fali 
Edmundo Gonzalez uherutse gutsindwa amatora ya Perezida muri Venezuela ariko ntiyemere ibyayavuyemo akanavuga ko azarahira nk’Umukuru w’Igihugu, kuri ubu hashyizweho igihembo cy’ibihumbi $100 ku muntu wafasha kumuta muri yombi, mu gihe habura icyumweru kimwe gusa ngo Perezida Nicolas Maduro arahire.
Muri Nyakanga 2024 ni bwo Nicolas Maduro usanzwe ari Perezida wa Venezuela kuva mu 2013 yatsindiye manda ye gatatu ku majwi 51,2%.
Edmundo Gonzalez utavuga rumwe n’ubutegtsi bari bahanganye we hatangajwe ko yagize amajwi 44%, ariko yanga kwemera ko Perezida Maduro yamutsinze ko ahubwo amatora yajemo uburiganya.
Ayo matora ntiyavuzweho rumwe ku rwego mpuzamahanga kuko Amerika, Umuryango w’Ubumwe bw’u Burayi, Argentine, Costa Rica na Uruguay byatangaje ko bitemera ko koko Perezida Maduro ari we wayatsinze amatora ko ahubwo intsinzi ari iya Gonzalez.
Komisiyo y’Igihugu y’Amatora muri Venezuela na yo yakomeje kotswa igitutu ku byavuye muri ayo matora ariko ishimangira ko Perezida Maduro ari we wayatsinze.
Gonzalez muri Nzeri 2024 yashyiriweho impapuro zo kumuta muri yombi ashinjwa ibyaha birimo gucura umugambi w’ubugizi bwa nabi n’inyandiko mpimbano ahita yaka ubuhungiro uri Espagne yerekezayo.
Yakomeje ariko gusubiramo ko azaza kurahira nka perezida wa Venezuela kuko ari we watsinze amatora.
Reuters yanditse ko kuri ubu Gonzalez wari usanzwe yarashyiriweho impapuro zo kumuta muri yombi na Venezuela zongeweho igihembo cy’ibihumbi 100 $ ku watanga amakuru yatuma atabwa muri yombi.
Ni mu gihe ku itariki 10 Mutarama 2025 ari bwo hateganyijwe irahira rya Perezida Nicolas Madulo.
Kuri uyu wa Gatandatu Gonzalez biteganyijwe ko yerekeza muri Argentine kuganira na Perezida w’icyo gihugu, Javier Milei, usanzwe udacana uwaka na Maduro kuko amwita umunyagitugu.
France 24 yanditse ko umuhuro na Gonzalez na Milei ugamije gushakisha amaboko mu bihugu bitandukanye byo mu Karere Venezuela irimo bishyiguikiye Gonzalez ngo arebe ko umugambi we wo kuba ari we urahira nka perezida washoboka.
Fabos Fali 
