Kuwa 7 werurwe 2023 nibwo inkuru y’umugabo witwa Sebanani Eric wamenyekanye nka Kazungu watemye umugore we Murekeyiteto Suzane ijosi yatangiye kumenyekana. Uyu mugabo yishe umugore we abana be bareba ariko nyuma yo gukora iki cyaha arahunga aho n’abana be batanze ubuhamya ubwo bashyinguraga nyina kuwa 10 werurwe.    Ubuhamya bw’abana ba mama Ange wishwe n’umugabo we amuciye umutwe bavuga uko byagenze bwarijije benshi mu gushyingura

Mu makuru yagiye avugwa havuzwe ko intandaro ya byose ari uko umugore wa Kazungu wari uzwi ku izina rya mama Ange yari afite umwana bashakanye yaramubyaye, ndetse ko uyu mugore yanamusuzuguye akamucira mu maso bikaba intandaro yo kumwica.

Kuri uyu wa 20 mata 2023 ku rukiko rw’ibanze rwa Nyarugenge I Nyamirambo, nibwo uyu Kazungu yaje kuburana, aho yaburanaga ku ifungwa n’ifungurwa ry’agateganyo, imbere y’urukiko yireguye yemera icyaha akekwaho ariko avuga ko yabikoze yataye umutwe. Ubushinjacyaha bwavuze ko bwaregeye urukiko kubera koi fatwa rya Kazungu ritari ryoroshye kandi akaba atarafatiwe mu cyuho, ndetse ko kwemera icyaha ari ukwihunza inshingano cyane nko kuba agaragaza ko yabikoze ubwonko bwe butari ku murongo.

Ubushinjacyaha bumaze kugaragaza uruhande rwabwo, bwasabye urukiko ko Kazungu akomeza kuburana afunze kubera ko aramutse arekuwe bitakoroha kongera kumubona ariko kandi bikaba ari n’uburyo bwo kubungabunga ituze muri Rubanda.

Jallas dukesha iyi nkuru yatangaje ko mu kwiregura Kazungu yabanje gusaba Imana ndetse n’abanyarwanda imbabazi, avuga ko iki cyaha yagikoze afite umujinya kubwo kuba yari yarawutewe n’uko yarakaranyije n’umugore we, ariko bakaba bari basanzwe bafitanye n’amakimbirane ashingiye ku mwana uyu mugore yabyaye ahandi. Yavuze ati “nyuma y’uko umugore antutse akancira mu maso, nongeye kugarura ubwenge ndi kuzerera mu muhanda, nyuma mfashwe nibwo namenye ko nishe umuntu.”

Umucamanza amubajije impamvu yishe umugore we, yavuze ko na we atazi uko byagenze. Umwunganira mu mategeko yongeyeho ko Kazungu yakoze iki cyaha kubw’ubushotoranyi bwakozwe n’umugore we bigatuma ahungabana, bityo asaba urukiko ko ahubwo aho kumufunga yajyanwa I Ndera agasuzumwa byanaba ngombwa akitabwaho nk’umurwayi wo mu mutwe.

Nyuma yo kumva impande zombi umucamanza yapfundikiye urubanza avuga ko ruzasomwa kuwa 25 mata 2023. Icyaha Kazungu akurikiranweho cyakozwe kuwa 7 werurwe 2023 ubwo yatahaga asanga umugore mu rugo maze akamwica, aho avuga ko babanje guserera bakagirana amakimbirane. Kazungu mu rukiko yavuze ko yatashye afite icupa rya rikeri, arimukubita mu mutwe umugore arahunga ajya mu cyumba aho yamusanzemo amuca umutwe awuterera mu ndobo nk’uko abana batanze ubuhamya twabagejejeho muri iyi nkuru.