Kuwa 30 Nzeri 2023 nibwo telefone ya The Ben yibiwe i Burundi, kuwa 4 Ukwakira 2023 Ndagijimana Eric uzwi nka X-Dealer akaba n’inshuti cyane ya The Ben atabwa muri yombi akekwaho kwiba iyo telefone. Kuri uyu wa 24 Ugushyingo 2023, Urukiko Rwisumbuye rwa Nyarugenge rwategetse ko X-Dealer afungurwa by’agateganyo.

Umucamanza yategetse ko buri wa Gatanu wa nyuma w’icyumweru azajya yitaba Umushinjacyaha. Uyu mugabo yafunguwe by’agateganyo Urukiko rugendeye ku cyemezo cy’umwunganira mu mategeko wemeye kumwishingira.

Ikiganiro cya mbere X-Dealer yagiranye n’Itangazamakuru, yavuze ko ubwo yafatwaga atari azi nyirizina ikintu ari kuzira, ndetse ageze muri RIB akabwirwa ko azira kwiba telefone ya The Ben, byamutangaje cyane. Ati “bambwira ko nibye telefone ya The Ben, nahise numva ari ikintu cyoroheje cyane ko n’ubundi ntari nabikoze, ariko ibintu bikajya bikomera kubera ibyo nabwirwaga.”

X-Dealer avuga ko ubwo yari muri kasho ya RIB, The Ben yaje kumusura, amubaza niba koko atekereza ko ari we waba waramwibye iyo telefone, The Ben amusubiza ko ngo ‘Niba utarayibye Imana irakoresha ubutabera’ mu gutungurwa kwinshi aramubwira ati “Imana irakoresha ubutabera kandi mfunzwe?”

X-Dealer usanzwe ari inshuti ya The Ben cyane ndetse na mbere y’uko igitaramo kiba i Burundi yamufashaga mu kucyamamaza, yavuze ko ubwo The Ben yazaga kumureba muri RIB ushinzwe umutekano we yamubwiye ko ngo afite amashusho (Video) ari kwiba iyo telefone. Ati “Ndamuzi ni uwitwa Danny, naramubwiye nti ‘niba koko ufite videwo ndi kwiba iyo telefone, uretse no kumfunga bandase.’ The Ben arambwira ati ‘nta kibazo wigira ikibazo koko niba ntayo watwaye, Imana iratanga ubutabera.”

Avuga ko nta kintu yigeze asaba The Ben icyo gihe kubera ko yabonaga ari uguta inyuma ya Huye. Uyu mugabo avuga ko ubwo yageraga mu Rukiko Abashinjacyaha bamushinja, we yari yaramaze kwiyakira ariko abizi neza ko agiye kuburana akaba umwere, gusa icyamutunguye ni ubuhamya bw’uwaje avuga ko ngo bari barapanze gahunda yo kujya kuyiba. (Mwibuke uwitwa Pilato yigeze kubwira itangazamakuru ko X-Dealer yari yaramuhaye igitekerezo ku kwiba telefone ya The Ben.”

X-Dealer agira ati “Ibyo bimaze kuntungura nari mbizi neza ko nabeshyewe, ndetse yewe kuko hari n’umuntu wo muri Team ya The Ben twari dufitanye ikibazo, nahise menya ko byose ari we uri kubintegurira.” Uyu mugabo avuga ko atari ibanga kuko byose uwabimuteguriraga banafitanye ikibazo ni Muyoboke Alex. Nibwo yahise akatirwa gufungwa iminsi 30 y’agateganyo.

Uyu mugabo akomeza avuga ko uwamuhimbiye ikinyoma yari afite amakuru makeya, kubera ko yavugaga igihe telefone yaziye mu Rwanda, ariko X-Dealer we akaba yaraje nyuma y’icyo gihe, kuburyo byagaragaraga ko ari ikinyoma, mu rukiko aba aribwo ahishura igihe yaziye bihabanye n’igihe telefone yagereye mu Rwanda, hatangira kwibazwa uburyo yagiye kwiba telefone akayohereza agataha nyuma yayo.

X-Dealer avuga ko kandi mu gutaha ava i Burundi yazanye n’abandi bantu, ariko yatunguwe no kuba ari we bashyizeho icyaha cya telefone, ikirenze ibyo abari kumwe na we bose umunara wa Nyamirambo watrackinzweho iyo telefone bose barawukoresha, akibaza impamvu bo batafashwe agashyirwaho icyaha wenyine.