Fabos Fali 
Perezida wa Repubulika Iharanira Demokarasi ya Congo, Félix Antoine Tshisekedi Tshilombo yatangaje ko adateze guhagarika imirwano ingabo ze zihanganyemo na M23, atabaza abanyamadini, abakinnyi, abahanzi, urubyiruko n’abasaza ngo bafashe ingabo za FARDC zishobore gukomeza urugamba.
Ingabo za FARDC zimaze imyaka itatu zihanganye n’umutwe wa M23 uharanira uburenganzira bw’abavuga Ikinyarwanda bo mu Burasirazuba bwa RDC bamaze imyaka myinshi bahohoterwa, bicwa; byatumye baba impunzi imyaka ikabakaba 30.
Gusa Mutarama 2025 ntiyahiriye FARDC n’imitwe bafatanyije irimo Wazalendo, uw’iterabwoba wa FDLR, abacanshuro n’ingabo za SADC (SAMIDRC) kuko M23 yabatsinze ndetse birangira ifashe Goma ku wa 26 Mutarama.
Kuri uyu wa 29 Mutarama 2025, ubwo abandi bakuru b’ibihugu bari mu nama yiga ku buryo umutekano wagaruka mu Burasirazuba bwa RDC, Tshisekedi yari kuri Televiziyo y’Igihugu abwira abaturage ko intambara igomba gukomeza kugeza igihe bazatsindira urugamba.
Uyu mukuru w’igihugu yavuze ko uduce twose M23 yigaruriye bazatwisubiza binyuze mu ntambara.
Mu bihe byashize ubwo intambara yari imaze gukomera yitabaje abacanshuro b’i Burayi, ingabo z’u Burundi, iza SADC, imitwe yitwaje intwaro itandukanye ariko urugamba rurananirana, ndetse bamwe bamanika amaboko mu buryo busuzuguritse barataha.
Kuri ubu Perezida Tshisekedi yavuze ko inzego za Leta yazitegetse kwizirika umukanda, anatabaza inzego zose ngo zirwane ku ngabo z’igihugu.
Ati “Ndashaka kubasaba mwese, abagore n’abagabo, urubyiruko n’abashesha akanguhe, abanyapolitike, abakora mu nzego z’ubukungu imiryango itegamiye kuri Leta n’amadini abahanzi n’abakinnyi ngo mwishyire hamwe mujye inyuma y’ingabo zacu buri wese atange umusanzu we mu ntambara.”
“Nasabye Guverinoma ngo ishyireho ingamba zo kugabanya mu buryo bufatika ibyo bakoresha mu kazi ka buri munsi, kugira ngo ayo bazigamye ahite yoherezwa gufasha ingabo.”
Tshisekedi kandi yavuze ko inzego z’abikorera zigomba gutanga umusanzu wazo muri uru rugamba.
Yasabye urubyiruko kujya ku bwinshi mu gisirikare kurwana ku busugire bw’igihugu cyabo.
Ni mu gihe bamwe mu basirikare ba FARDC bahungiye mu Rwanda barimo n’abarwanyi ba Wazalendo babwiye IGIHE ko babonye M23 ibatsinze mu bice bitandukanye bagahitamo gukuramo akabo karenge kuko n’abayobozi babo bari bakijije amagara yabo rugikubita.
Nubwo Tshisekedi avuga ko biteguye kwisubiza ibice byose M23 yigaruriye no gutsinda intambara, abacanshuro barenga 280 bafashaga ingabo za FARDC bamaze guhunga bisubirira iwabo.
Abakuru b’ibihugu bya EAC basabye Repubulika Iharanira Demokarasi ya Congo guhagarika intambara no kuganira na M23 n’indi mitwe mu nzira yo gushaka amahoro arambye mu karere.
Fabos Fali 
