Fabrice Nahimana Ihuriro AFC/M23 rirwanya ubutefetsi bwa Kinshasa ryatangaje ko muri iki cyumweru dusoza abandi bakomando hafi 10,000 basoje imyitozo ikaze bamazemo amezi, biyongera ku bandi basaga 7000 batorejwe mu kigo cya Rumangabo bamuritswe mu kwezi gushize.
Umuvugizi wa AFC/M23, Lawrence Kanyuka, abinyujije kuri X, mu rukerera rwo kuri iki Cyumweru yavuze ko ” Umuhango wo gusoza amasomo ku bakomando bashya barenga 9.350 wabereye kuwa Gatatu, itariki ya 1 Ukwakira 2025, i Tchanzu, mu Ntara ya Kivu y’Amajyaruguru.”
Aba basirikare bigishijwe kurasa, tekiniki zo kurwana n’umwanzi mwegeranye, imikino njyarugamba, amayeri y’urugamba n’akarasisi kari ku murongo katarimo akajagari.
Uyu muhango wabereye i Tshanzu, kimwe n’uwabereye Rumangabo wayoboye n’Umugaba Mukuru w’Ingabo za ARC, Gen. Sultan Makenga, wongeye kubasaba kurangwa na disipuline n’ubutwari, bagaharanira kubohora Congo n’Abanyekongo.
Mu ijambo rye yagize ati: “Igihugu cyacu cyasenywe igihe kinini na Guverinoma ya Kinshasa iyobowe na Tshisekedi. Ubutegetsi busenya igihugu, busahura, bwica abasivili uko bushaka bitewe n’ubwoko n’amasura yabo, bukagira Abanyekongo impunzi, bukagira igihugu cyacu umutungo bwite. Ni yo mpamvu M23/ARC yahagurutse kugirango ihagarike iyo miyoborere mibi kandi izane impinduka mu gihugu cyacu. Muriteguye?”
Yongeye kugaragaza ko intego ya AFC/M23 ari ugukraho ubutegetsi bwa Kinshasa, aho yagize ati: ” Bagenzi banyu bamaze koherezwa mu bindi bice barimo gukora akazi keza cyane namwe muzoherezwayo kubafasha no gufatanya kugirango dukureho ubu butegetsi bubi. Murankurikira?”
Yakomeje agira ati: ” Igihugu cyacu gikeneye kubohorwa. Abanyekongo bose uko bangana bakeneye kubohorwa, kandi ni ko kazi kacu nk’umutwe wa M23, nk’Igisirikare cya ARC…ni ko kazi kacu tugomba gukora kugirango cyongere kubona icyubahiro, twongere kubaka igihugu cyacu kandi abaturage bacu babeho mu cyubahiro bafite igisirikare gikomeye, cya kinyamwuga kandi cyegereye abaturage,”
Umugaba Mukuru wa ARC yakomeje asaba izi ngabo kwirinda ruswa, ivangura, ibiyobyabwenge no gufata ku ngufu kuko ibyo bikorwa bitazigera byihanganirwa. Yagaragaje ko hakenewe ingabo zifite ikinyabupfura kandi zegereye abaturage.
Ibi bije nyuma y’uko ku itariki ya 14 Nzeri 2025, AFC / M23 yari yerekanye abakomando bashya 7.437, mu muhango wabereye mu kigo cy’imyitozo cya Rumangabo.
Aba bari bagizwe n’abahoze ari abasirikare ba FARDC binjiye mu Gisirikare cy’Impinduramatwara cya Congo (ARC) mu gihe cyo kubohoza imijyi ya Goma na Bukavu, ndetse n’abarwanyi bahoze ari Mai-Mai Wazalendo n’abasirikare bashya.
