Fabrice Nahimana Rutahizamu Joy-Lance Mickels waherukaga guhamagarwa mu Ikipe y’Igihugu ’Amavubi’ bwa mbere, ashobora kutitabira ubutumire nyuma y’uko avunikiye mu mukino Sabah FK akinira yatsinzemo FK Karvan Evlakh ibitego 2-0.
Kuri iki Cyumweru, tariki ya 5 Ukwakira 2025, ni bwo hakinwe Umunsi wa Karindwi wa Shampiyona y’Icyiciro cya Mbere cya Shampiyona ya Azerbaijan.
Sabah FK ikinamo Joy-Lance Mickels yahuye na FK Karvan Evlakh, ndetse ku munota wa 31 uyu rutahizamu afungura amazamu, nyuma y’iminota itandatu mugenzi we Kaheem Parris ashyiramo icya kabiri.
Mickels wagize umukino mwiza kuri uyu munsi yagize imvune ku munota wa 11 w’inyongera kuri 90 y’umukino, ubwo yagonganaga n’umunyezamu wa FK Karvan Evlakh, Kamran Ibrahimov.
Mickels yavuwe n’abaganga b’ikipe mu kibuga, ariko biba iby’ubusa hahamagazwa imbangukiragutabara ari na yo yamukuye mu kibuga imwihutana ku bitaro.
Ntabwo haratangazwa ubwoko bw’imvune uyu mukinnyi yagize ndetse n’igihe azamara hanze y’ikibuga.
Ibi bisobanuye ko atazagaragara ubwo Amavubi azaba yakira Bénin tariki ya 10 Ukwakira kuri Stade Amahoro, no gusura Afurika y’Epfo tariki ya 14 Ukwakira 2025.
