Fabrice Nahimana Umutwe wa AFC/M23 watanze impuruza, nyuma y’uko ihuriro ry’ingabo za Leta ya Repubulika Iharanira Demokarasi ya Congo ryongeye kwica agahenge impande zombi zumvikanye.
Muri uku kwezi ni bwo AFC/M23 na Leta ya Repubulika Iharanira Demokarasi ya Congo basinyiye i Doha muri Qatar amasezerano y’agahenge, banemeza gishyiraho urwego rugomba gukurikirana iyubahirizwa ry’ako.
Umuvugizi wa AFC/M23, Lawrence Kanyuka abinyujije ku rubuga rwe rwa X, yatangaje ko kuri uyu wa Kabiri tariki ya 21 Ukwakira ingabo za Leta zishe agahenge nyuma yo kurasa mu duce twa Mpeti ho muri Teritwari ya Masisi muri Kivu y’Amajyaruguru na Nzibira ho muri Teritwari ya Walungu muri Kivu y’Amajyepfo.
Yagize ati: “AFC/M23 iratanga impuruza ku banyagihugu n’amahanga ku iyicwa ry’agahenge rikomeje gukorwa n’ubutegetsi bwa Kinshasa. Kuri uyu wa Kabiri tariki ya 21 Ukwakira, izo ngabo zagabye zibifashijwemo na drones za CH-4 uruhererekane rw’ibitero byibasiye uduce dutuwe cyane twa Mpeti, Nzibira no mu nkengero zaho, zishyira mu byago ubuzima bw’abaturage b’abasivile.”
AFC/M23 yavuze ko yifatanyije n’abaturage, inabamenyesha ko yiteguye kubarinda ndetse no gukemura ikibazo kibugarije biciye mu kugisanga aho gituruka.
Ibitero byo muri Mpeti na Nzibira birakurikira ibyo ingabo za Leta zagabye kuri AFC/M23 mu gace ka Kalembe muri Masisi, na bwo zikoresheje drones z’intambara.
Izi ngabo kandi kuri uyu wa Kabiri amakuru avuga ko zagabye ibitero ku birindiro bya M23 biherereye mu gace ka Tongo ho muri Teritwari ya Rutshuru, ahabereye imirwano ikomeye.
