Fabrice Nahimana Kuri uyu wa Mbere, itariki ya 17 Ugushyingo, indege yari itwaye intumwa zirimo Minisitiri w’ubucukuzi bw’amabuye y’agaciro, Louis Watum Kabamba, yakoze impanuka, ku kibuga cy’indege cya Kolwezi mu Ntara ya Lualaba.
Indege yari ivuye i Kinshasa, yarenze umuhanda indege zururukiraho mbere yo gufatwa n’inkongi y’umuriro maze irashya, bitera ubwoba ababibonye.
Minisitiri n’ intumwa zose bari kumwe bashoboye gusohoka mu ndege amahoro nk’uko iyi nkuru dukesha ACTUALITE.CD ivuga.
Nk’uko umujyanama we ushinzwe itumanaho, Isaac Nyembo abitangaza ngo nta wakomeretse, nubwo imizigo yose yatikiriye mu ndege.
Isaac Nyembo yagize ati: “Twari itsinda ry’abantu bagera kuri makumyabiri bari kumwe na Minisitiri w’ubucukuzi bw’amabuye y’agaciro tuva i Kinshasa. Indege yananiwe kugwa maze ifatwa n’umuriro. Twese twasohotse mbere y’uko umuriro ukwira mu ndege.”
Minisitiri Watum Kabamba yari agiye i Kolwezi gukurikiranira hafi impanuka yahitanye abantu ahacukurwa amabuye y’agaciro i Kalondo, hafi y’umudugudu wa Mulondo, muri Teritwari ya Mutshatsha, aho abacukuzi barenga 40 basize ubuzima.
