Fabrice Nahimana Imirwano irimo ubugome bwinshi kuri uyu wa Kane ushize yabereye mu misozi ya Minembwe, mu Ntara ya Kivu y’Amajyepfo, aho bivugwa ko yahuje abarwanyi ba AFC/M23 n’Ingabo za Congo (FARDC) zifatanyije n’Ingabo z’u Burundi n’inyeshyamba za wazalendo.
Kuva mu byumweru bibiri bishize, Ingabo za Repubulika ya Demokarasi ya Congo (FARDC) zatangije ibitero ku birindiro by’abarwanyi ba Twirwaneo, bakorana na AFC/M23. Kuri uyu wa Kane, itariki 12 Gashyantare 2026, imirwano yabereye mu midugudu ya Kakenge, Kabingu, Ilundu, Muriz ana Kalingi, mu misozi miremire ya Minembwe.
Ibitero mu midugudu y’Abanyamulenge mu gihe Angola yasabye agahenge
“ Kwemera agahenge ni ikintu kimwe no kukubahiriza n’ikindi. Hashize hafi ibyumweru bibiri, Minembwe yibasiwe na FARDC na FDNB (Igisirikare cy’u Burundi). Haranavugwa abasirikare ba Tanzania ndetse, birumvikana, n’abacanshuro na wazalendo bagerageje gufata Minembwe ntibabigeraho,” ibi byatangajwe na Senateri Moise Nyarugabo.
Nk’uko iyi nkuru dukesha Kivu Morning Post ivuga, Nyarugabo yasobanuye ko kuri uyu wa Kane, itariki 12 Gashyantare, ihuriro rya FARDC, rishyigikiwe na za drones n’ibibunda bya muzinga ryerekeje mu midugudu yo muri Minembwe, bica umukecuru w’imyaka 101 witwa Mukuzakabano Elisabeth.
Abandi bagore babiri bakomerekeye mu gitero cya bombe cyagabwe ku Bitaro bya Bidegu.
Nyarugabo ati: “ Ni ngombwa kwibutsa ko muri iyi minsi itatu ishize, kuwa Kabiri, kuwa Gatatu no kuwa Kane….imidugudu ya Kalingi, Bidegu, Rubemba, Karongi, Mukoko na Ilundu yatewe amabombe buri umwe inshuro nyinshi ku munsi. Mu gihe bwana Felix Tshisekedi yirirwa mu mirwa mikuru n’imirwa mikuru yigira nk’uri gushaka amahoro……”
Uyu mugabo yamaganye kandi guceceka kwa sosiyete sivile, Afurika Yunze Ubumwe, amashami ya Loni n’indi miryango ku bitero bikomeje kugabwa I Minembwe.
Ibi biravugwa mu gihe kuri yu wa Kane n’ubundi Angola yatangaje agahenge hagati ya Kinshasa na AFC/M23 guhera ku itariki 18 Gashyantare 2026.
AFC/M23 yashinje kenshi FARDC kurenga ku gahenge yirengagije ibyemerejwe mu Biganiro bya Doha, mu gihe ikomeza gushimangira ko imiryango igikinguye ku nzira zose zaganisha ku mahoro no kurangiza amakimbirane
