Fabrice Nahimana Umukinnyi wa filime akaba n’umwanditsi wazo, Nyambo Jessica, yavuze ko hari bamwe mu basore b’iki gihe bafite imyitwarire imutera impungenge, kuko ngo usanga bahugiye mu kwiyitaho no mu buzima bworoshye aho kwibanda ku kazi no kwitegura kubaka ejo hazaza.
Mu kiganiro yagiranye na ISIMBI, Nyambo yasobanuye ko nubwo atavuga abasore bose, hari umubare munini ubaho nta mirimo ifatika ibinjiriza amafaranga, ahubwo bagakunda kwita cyane ku buryo bagaragara no kumara igihe kinini mu bikorwa byo kwirimbisha.
Yagize ati, muri iki gihe hari abasore usanga bigoye kubatandukanya n’abagore bitewe n’uko bakora ibintu byahoze bifatwa nk’iby’abagore, nyamara bakirengagiza inshingano zo gushaka imibereho no gutegura ubuzima bw’ejo hazaza.
Nyambo yavuze ko, kuri we, umugabo akwiriye guhora atekereza ku iterambere rye, gushaka akazi cyangwa gukora imishinga imuteza imbere, kugira ngo azabashe kwiyubakira umuryango uzira ibibazo by’ubukene.
Yongeyeho ko bitumvikana ukuntu hari abasore bamara amasaha menshi muri salo biyitaho kurusha na bamwe mu bakobwa, kandi nta bikorwa bifatika bibafasha kwinjiza amafaranga bafite.
