Fabrice Nahimana Abaganga n’abaforomo bari kwita ku barwayi ba Ebola n’abayikekwaho muri Repubulika Iharanira Demokarasi ya Congo bakoze imyigaragambyo yo guhagarika akazi kubera imishahara bamaze igihe batishyurwa na Leta.
Iyi myigaragambyo yabereye muri Bunia, umurwa mukuru w’intara ya Ituri, yahungabanyije bimwe mu bikorwa byo kwita ku barwayi b’iki cyorezo ndetse n’abo bikekwa ko bacyanduye.
Amakuru aturuka muri Bunia avuga ko aba bakozi bavuye mu mirimo guhera kuri uyu wa 25 Nyakanga 2026, bituma abarwayi benshi batabona ababaha ubufasha bwihuse.
Bamwe muri aba bakozi barakaye, batangira gufunga imihanda igana ku mavuriro bakoresheje ibikoresho birimo amapine yatwitswe.
Abakozi bigaragambya bavuga ko bamaze amezi menshi badahembwa kandi basaba guhabwa byihuse imishahara yabo n’ibindi bagenerwa.
Iyi myigaragambyo ibaye mu gihe intara ya Ituri yugarijwe bikomeye na Ebola. Hari impungenge ko iki cyorezo gikwirakwira ku muduvuko urenze usanzwe kubera ko abakirwanya bahagaritse akazi.
Mbere y’iyi myigaragambyo, aba bakozi bagaragaje ko bakora mu buryo bugoye burimo gutinda kubona imishahara yabo, kwibasirwa n’abaturage batemera ko iki cyorezo gifite ubukana no kutabona ibikoresho bihagije birimo iby’ubwirinzi.
Minisiteri y’Ubuzima muri RDC igaragaza ko kugeza ku wa 21 Nyakanga 2026, byemejwe ko abantu 2536 ari bo bari bamaze kwandura Ebola muri rusange, barimo 1033 bapfuye na 506 bakize.
