UMUHOZA M. Chantal Imiryango 510 iteganyijwe kwimurirwa mu mudugudu w’icyitegererezo uzubakwa mu rwego rwo gushyigikira abaturage bo mu bice bigiye kwagurwamo Pariki y’Igihugu y’Ibirunga.
Iyi gahunda iri mu mushinga munini wa ‘Volcanoes Community Resilience Project (VCRP)’, ugamije kongera ubushobozi bw’abaturage n’inzego z’igihugu mu guhangana n’imyuzure, inkangu, isuri n’ingaruka z’imihindagurikire y’ibihe.
Ku wa 5 Kanama 2026, u Rwanda rwasinyanye na Banki y’Ishoramari y’Abanyaburayi (EIB) amasezerano y’inguzanyo ya miliyoni 65 z’Amayero, ni ukuvuga asaga miliyari 109,7 Frw, azagira uruhare mu gushyira mu bikorwa uyu mushinga.
VCRP izibanda mu turere twa Gakenke, Burera, Musanze, Nyabihu, Rubavu, Rutsiro, Ngororero na Muhanga, aho abaturage barenga miliyoni 2,3 bazagerwaho n’ibikorwa byo kugabanya ibyago by’ibiza, kubungabunga ibidukikije no guteza imbere ubukungu butangiza ibidukikije.
Mu rwego rwo gusubiranya ibidukikije, hazaterwa amashyamba kuri hegitari 1.177, hakorwe ubuhinzi buvanze n’amashyamba kuri hegitari 10.388, ndetse hasanwe hegitari 2.955 z’amashyamba yangiritse.
Umushinga uzanagira uruhare mu kwagura Pariki y’Igihugu y’Ibirunga. Hazongerwaho hegitari 3.740 ku buso bwa pariki busanzwe buri hafi ya hegitari 16.000.
Abaturage batuye mu bice bizongerwa kuri pariki bazimurwa, bagahabwa ingurane cyangwa bagafashwa kubona aho gutura. Bazanahabwa amahugurwa mu buhinzi bugezweho kugira ngo kwimurwa bitabangamira imibereho yabo.
VCRP ifite agaciro karenga miliyoni 300 z’Amadolari, ikaba igizwe n’ibikorwa byo gukumira imyuzure, gusubiranya ubutaka bwangiritse, kwagura Pariki y’Ibirunga no kongerera abaturage ubumenyi bwo guhangana n’ibiza.
Iyi nkuru yakozwe hashingiwe ku makuru yatangajwe na Igihe.com.
