UMUHOZA M. Chantal Abasirikare 146 bo mu Ngabo z’u Rwanda (RDF) barangije amahugurwa yihariye ya Military Police, agamije kubongerera ubumenyi n’ubushobozi mu bikorwa bitandukanye by’umutekano.
Aba basirikare barangije amasomo yari amaze ibyumweru birindwi, yabereye mu Ishuri Rikuru rya Gisirikare rya Gako, akaba yarateguwe ku bufatanye bw’Ingabo z’u Rwanda n’Ingabo za Qatar.
Umuhango wo gutanga impamyabumenyi ku bayarangije wabaye kuri uyu wa 12 Kanama 2026, uyoborwa n’Umugaba Mukuru w’Ingabo z’u Rwanda, Gen MK Mubarakh.
Muri aya mahugurwa, abasirikare bigishijwe ibintu birimo kurinda abayobozi bakuru n’abandi bantu bafite umutekano wihariye, kurwanya iterabwoba, ibikorwa by’imirwano mu mijyi ndetse no guhangana n’imyigaragambyo ishobora guteza umutekano muke.
Gen MK Mubarakh yashimiye abarangije aya mahugurwa ku bw’umuhate n’ikinyabupfura bagaragaje, abasaba gukoresha ubumenyi bungutse mu kazi kabo ndetse no kubusangiza bagenzi babo.
Yashimye kandi uruhare rw’abatoza baturutse mu Ngabo za Qatar, agaragaza ko aya mahugurwa ari ikimenyetso cy’ubufatanye bugenda bukomera hagati y’u Rwanda na Qatar mu bijyanye n’umutekano n’amahugurwa ya gisirikare.
Uhagarariye Ingabo za Qatar yashimiye RDF ku bufatanye n’uburyo yafashije kugira ngo aya mahugurwa agende neza.
Source: Rwanda Defence Force (RDF) / Ministry of Defence
