UMUHOZA M. Chantal Umuryango w’Ubucuruzi w’Afurika y’Iburasirazuba n’Amajyepfo (COMESA) watangiye ibiganiro i Kigali bigamije gutegura ingamba zihuriweho ku ikoreshwa ry’ubwenge buhangano (AI) no guteza imbere ikoreshwa ry’ikoranabuhanga mu bihugu biwugize.
Ibiganiro by’iminsi ine byahuje abayobozi ba Leta, inzego zishinzwe ikoranabuhanga, abikorera, abashakashatsi, sosiyete sivile n’abafatanyabikorwa mu iterambere.
Intego ni ugutegura ingamba za COMESA ku bwenge buhangano ndetse n’izigamije guteza imbere ikoreshwa ry’ikoranabuhanga ku baturage bose.
COMESA ivuga ko izi ngamba zizafasha ibihugu biwugize gukorana mu guteza imbere ikoranabuhanga no kugabanya icyuho kiri hagati y’abafite uburyo bwo gukoresha internet n’ikoranabuhanga n’abatabufite.
Mu biganiro, hanibanzwe ku buryo AI yakwifashishwa mu nzego zitandukanye zirimo ubuhinzi, ubuzima n’uburezi.
Abitabiriye kandi baganiriye ku bibazo bijyanye n’igiciro cya internet n’ibikoresho by’ikoranabuhanga, ubumenyi mu ikoranabuhanga, umutekano wo kuri internet ndetse no kurinda amakuru y’abaturage.
Ibiganiro byabereye i Kigali byatewe inkunga na Banki y’Isi binyuze muri gahunda ya Inclusive Digitalisation in Eastern and Southern Africa (IDEA).
COMESA yashimye ubunararibonye u Rwanda rumaze kugira mu ikoranabuhanga n’ubwenge buhangano, ivuga ko bushobora kugira uruhare mu gutegura ingamba z’akarere.
Ibyavuye muri ibi biganiro bizakoreshwa mu gutegura ingamba za COMESA kuri AI ndetse n’ingamba z’ikorwa ryazo mu bihugu bigize uyu muryango.
