Fabrice Nahimana Tombola y’irushanwa rya CECAFA Kagame Cup yasize amakipe yose amenye amatsinda azakiniramo, aho Rayon Sports yisanze mu Itsinda C ririmo Al Hilal SC yo muri Sudani, naho APR FC yisanga hamwe na Gor Mahia yo muri Kenya.
Mu gitondo cyo kuri uyu wa Gatanu, tariki ya 10 Nyakanga 2026, ni bwo mu cyumba cya Stade Amahoro habereye tombola y’irushanwa ritegurwa n’Ishyirahamwe ry’Umupira w’Amaguru muri Afurika y’Iburasirazuba no Hagati (CECAFA).
Iyi tombola yayobowe na Haruna Niyonzima, nk’umunyabigwi wakiniye amakipe atatu muri 12 azakina CECAFA Kagame Cup 2026. Ayo ni APR FC na Rayon Sports zo mu Rwanda, hamwe na Simba SC yo muri Tanzania.
Itsinda rya mbere ryisanzemo APR FC yo mu Rwanda, Vipers SC yo muri Uganda, Gor Mahia yo muri Kenya na FC Garde Républicaine yo muri Djibouti.
Itsinda rya Kabiri ririmo Singida Big Stars na Simba SC zo muri Tanzania, Jamus yo muri Sudani y’Epfo na Mogadishu City yo muri Somalia.
Itsinda rya Gatatu ririmo Al Hilal SC yo muri Sudani ikina muri Shampiyona y’u Rwanda, Rayon Sports yo mu Rwanda, Tusker FC yo muri Kenya na KVZ SC yo muri Zanzibar.
Amakipe azaba aya mbere muri buri tsinda n’indi imwe ya kabiri yitwaye neza mu itsinda, azahita ajya muri ½, ahatanire kujya ku mukino wa nyuma. Azatsindirwa muri iki cyiciro ahatanire umwanya wa gatatu.
Imikino izabera kuri Stade Amahoro ndetse na Kigali Pelé Stadium, kuva tariki ya 24 Nyakanga kugeza ku ya 7 Kanama 2026.
Amakipe amaze kwegukana CECAFA Kagame Cup ni Simba SC yayitwaye inshuro esheshatu, Gor Mahia yayitwaye inshuro eshatu, APR inshuro eshatu, Tusker inshuro ebyiri, Singida inshuro imwe na Rayon Sports inshuro imwe.
