UMUHOZA M. Chantal - Amafaranga Abanyasomali baba mu mahanga boherereza imiryango yabo akomeje kugira uruhare runini mu bukungu bwa Somalia, cyane cyane mu murwa mukuru Mogadishu.
Amakuru mashya ya Banki Nkuru ya Somalia agaragaza ko amafaranga yoherejwe muri iki gihugu mu 2025 yazamutseho 5%, agera kuri miliyari 6.78 z’amadolari.
Mu 2024, yari miliyari 6.43 z’amadolari.
Amafaranga yoherezwa n’abantu ku giti cyabo ni yo menshi. Mu 2025, yageze kuri miliyari 3.13 z’amadolari, angana na 46% by’amafaranga yose yinjiye mu gihugu.
Banki Nkuru ya Somalia ivuga ko ayo mafaranga afasha imiryango kubona ibyo ikenera, ndetse agashyigikira ibikorwa by’ubucuruzi n’izindi serivisi.
Ibi bibaye mu gihe Somalia ikomeje guhura n’igabanuka ry’imfashanyo mpuzamahanga. Amafaranga aturuka muri diaspora akaba akomeje kuba inkingi ikomeye y’ubukungu bw’igihugu.
Mu 2025, amafaranga yose yinjijwe mu gihugu binyuze muri banki n’ibigo byohereza amafaranga yatumye ubukungu bukomeza kubona amafaranga y’amanyamahanga kandi ibicuruzwa bikomeza kugurwa.
Banki Nkuru kandi ivuga ko umwenda w’amahanga wa Somalia wagabanutse uva kuri miliyari 5.23 z’amadolari mu 2018 ugera kuri miliyari 1.48 z’amadolari mu 2025.
