UMUHOZA M. Chantal Tanzania yatangije ku mugaragaro uruganda rukora amashanyarazi akomoka ku mazi rufite ubushobozi bwa Megawatt 2,115, rukaba ari rwo runini muri Afurika y’Iburasirazuba.
Uruganda rwa Julius Nyerere Hydropower Project rwubatswe ku mugezi wa Rufiji, rutwara Tanzania hafi ya tiriyari 7.45 z’amashilingi, ahwanye na miliyari hafi 2.84 z’amadolari.
Nyuma yo gutangira gukora, ubushobozi bwa Tanzania bwo kubyara amashanyarazi bwageze kuri MW 4,646, mu gihe amashanyarazi akenerwa ku rwego rwo hejuru ari MW 2,271.
Ibi bitumye Tanzania isigara ifite amashanyarazi arenze ayo ikenera ku rugero rwa MW 2,375, bikaba bishobora gutuma igihugu cyongera amashanyarazi gihereza ibindi bihugu birimo Kenya na Zambia.
Perezida wa Tanzania, Samia Suluhu Hassan, yavuze ko uyu mushinga ushobora kongera amahirwe y’ishoramari, ubucuruzi, imirimo n’umusaruro w’igihugu.
Gusa uyu mushinga wari umaze igihe utemerwa n’imiryango iharanira kubungabunga ibidukikije, kubera impungenge z’uko urugomero rushobora kugira ingaruka ku nyamaswa n’ibindi binyabuzima byo mu gace ka Selous Game Reserve.
Source: Reuters / CNBC Africa
