Fabrice Nahimana Leta y’u Burundi yatangaje ko itazongera kwemera ko abantu bava mu bice bigenzurwa n’ihuriro AFC/M23 mu burasirazuba bwa Repubulika Iharanira Demokarasi ya Congo binjira ku butaka bwayo.
Ku wa 1 Ukwakira 2026, Minisitiri ushinzwe umutekano mu Burundi, Léonidas Ndaruzaniye, yavuze ko iki cyemezo kireba Abanye-Congo ndetse n’abanyamahanga barimo abakozi b’imiryango mpuzamahanga bakorera mu bice bigenzurwa na AFC/M23.
Yabivugiye mu nama yagiranye n’abapolisi i Bujumbura, asobanura ko iki cyemezo kizashyirwa mu bikorwa hashingiwe ku makuru agaragara ku byangombwa by’abagenzi.
Iki cyemezo kije mu gihe AFC/M23 ikomeje kugenzura ibice bitandukanye byo mu burasirazuba bwa RDC, birimo imijyi ya Goma na Bukavu.
AFC/M23 yafashe ibice byinshi ibikuyemo ingabo za RDC, iz’u Burundi n’imitwe ya Wazalendo; ibituma ibihugu byombi bibabazwa n’uko iri huriro rikibigenzura.
Amakuru avuga ko iki cyemezo gishingiye ku busabe bwa Leta ya RDC, bugamije kugabanya ubushobozi bwa AFC/M23 ariko ku rundi ruhande, bamwe babona ko abo kizagiraho ingaruka nyinshi ari abaturage, abacuruzi n’abakozi bo mu nzego z’ubutabazi.
