Fabrice Nahimana Hari ibintu bibiri bikomeje kuvugwa ko biri kugora ingabo z’u Burundi ziri mu bikorwa bya gisirikare mu burasirazuba bwa Repubulika Iharanira Demokarasi ya Congo.
Icya mbere, ayo makuru avuga ko indege zitagira abapilote (drones) zikoreshwa na M23 zikomeje guteza igihombo ku ngabo bahanganye, kuko ngo kugeza ubu zitarabonerwa uburyo buhamye bwo kuzirinda cyangwa kuzikumira.
Icya kabiri, ayo makuru aravuga ko bamwe mu barwanyi ba M23 bavuga ururimi rw’Ikirundi. Ababitangaza bavuga ko ibi bishobora guteza urujijo ku basirikare b’u Burundi, kuko bashobora kumva bavuga Ikirundi bakibwira ko ari ingabo zaje kubatera ingabo mu bitugu, nyamara bikarangira bahuye n’abarwanyi bahanganye.
Hagati aho, amakuru ava mu gace ka Uvira avuga ko imirwano ikomeje hagati ya M23 n’ihuriro rigizwe na FARDC, Wazalendo n’izindi ngabo zifatanyije. Biravugwa ko imirwano ikomeye iri kubera mu nkengero z’agace ka Milimba, kegereye Kibanja, ahaherutse gufatwa na M23 mu cyerekezo cya Baraka.
Niba uko ibintu bikomeje bidahindutse, hari abasesenguzi bavuga ko Milimba ishobora gufatwa vuba na M23.
Agace ka Rurambo, na ko gaherutse gufatwa na M23, kari muri Teritwari ya Uvira. Kari ku ntera ya kilometero hafi 35 uvuye mu mujyi rwagati wa Uvira, bikagaragaza ko imirwano iri kugenda yegereza uwo mujyi.
