UMUHOZA M. Chantal Uwahoze ari umukinnyi w’iteramakofe ukomeye muri Afurika y’Epfo, Zolani “Last Born” Tete, yarashwe aricwa afite imyaka 38.
Tete yarashwe ku wa Gatanu, tariki ya 21 Kanama 2026, ubwo yari ageze iwe mu gace ka Mdantsane, muri Eastern Cape, Afurika y’Epfo.
Polisi yavuze ko abagabo babiri bitwaje imbunda kandi bambaye udupfukamunwa twabafashaga kwihisha, bavuye mu modoka baramurasa ubwo yari ategereje ko irembo ry’urugo rikingurwa. Tete yagerageje gutwara imodoka ava aho yaraswaga, ariko amasasu yaramwishe.
Umugore w’imyaka 27 wari kumwe na Tete na we yarashwe inshuro nyinshi. Yahise ajyanwa mu bitaro, aho yari agikurikiranwa n’abaganga. Kugeza ubu, polisi ntiratangaza icyateye ubwo bwicanyi cyangwa ngo ifate abakekwa.
Tete yari yarabaye umwe mu bakinnyi b’iteramakofe bakomeye muri Afurika y’Epfo. Yegukanye umukandara wa WBF Flyweight mu 2007, nyuma aza kwegukana umukandara wa WBO Bantamweight mu 2017.
Yamenyekanye cyane ku rwego mpuzamahanga mu 2017 ubwo yakuraga Siboniso Gonya mu mukino mu masegonda 11 gusa. Iyi ntsinzi yabaye imwe mu zo gutsinda vuba cyane mu mateka y’imikino yo guhatanira umukandara wa Shampiyona y’Isi.
Urupfu rwa Tete rwababaje cyane abakunzi b’iteramakofe muri Afurika y’Epfo. Minisitiri wa Siporo, Ubuhanzi n’Umuco muri Afurika y’Epfo, Gayton McKenzie, yavuze ko igihugu cyatakaje umwe mu bakinnyi bakomeye cyigeze kugira.
Tete yari amaze igihe adakina nyuma yo guhabwa igihano cyo kutitabira imikino, ariko yari amaze kurangiza icyo gihano muri Nyakanga 2026 kandi yari ateganya gusubira mu kibuga.
