UMUHOZA M. Chantal Ikibazo cy’amafaranga muri South Sudan gikomeje kubangamira ibikorwa bya Leta n’imibereho y’abaturage.
Leta ihanganye n’ibura ry’amafaranga mu mabanki, mu gihe bamwe mu bakozi ba Leta bamaze igihe badahembwa. Ibi kandi biri kugira ingaruka ku mishinga y’igihugu.
Mu bice bimwe, imirimo yo kubaka no gusana imihanda yaradindiriye. Hari n’abaturage bamara igihe ku mabanki bategereje kubikuza amafaranga yabo.
Iki kibazo kandi gishobora kugira ingaruka kuri gahunda z’amatora ateganyijwe muri uyu mwaka.
Ubukungu bwa South Sudan bushingiye cyane kuri peteroli. Ariko intambara iri muri Sudan yabangamiye uburyo peteroli y’igihugu itwarwa ikagera ku masoko mpuzamahanga.
Ibi byatumye igihugu gihura n’igabanuka ry’amafaranga y’amanyamahanga, ibintu bikomeza gushyira igitutu ku bukungu bwacyo.
Perezida Salva Kiir yasabye inzego zishinzwe imari gushaka ibisubizo by’iki kibazo no kunoza uburyo amafaranga ya Leta acungwa.
