UMUHOZA M. Chantal Ukwezi kwa Kanama kuzaba kurimo itandukaniro rikomeye ry’ubushyuhe mu bice bitandukanye by’u Rwanda, aho hari ahazaba hashyushye ku manywa, mu gihe ahandi hazakomeza kurangwa n’ubukonje, cyane cyane mu ijoro.
Iteganyagihe rya Meteo Rwanda ry’ukwezi kwa Kanama rigaragaza ko ubushyuhe bwo ku manywa bushobora kugera kuri 32°C, mu gihe muri rusange buzaba buri hagati ya 21°C na 32°C.
Ibice byo mu Burasirazuba n’ahandi hantu hasanzwe harangwa n’ubushyuhe ni byo biteganyijwemo ubushyuhe bwinshi. Mu bice bimwe by’Umujyi wa Kigali, Bugesera, Kayonza, Kirehe, Gisagara na Ngoma, kimwe n’Ikibaya cya Bugarama, ubushyuhe bwo ku manywa bushobora kugera kuri 31°C cyangwa 32°C.
Ibi bitandukanye n’ibiteganyijwe mu bice by’imisozi miremire, aho ubushyuhe bwo ku manywa bushobora kuguma hagati ya 21°C na 23°C. Aha harimo ibice bimwe bya Nyabihu, Musanze, Ngororero, Rubavu na Rutsiro.
Mu gihe ku manywa hari ahazaba hashyushye, ijoro ryo rizakomeza gutandukana bitewe n’aho umuntu abarizwa. Mu bice bimwe by’igihugu, ubushyuhe bwo hasi bushobora kumanuka bukagera kuri 10°C kugeza kuri 12°C.
Ubu bukonje bukomeye bwo mu ijoro buteganyijwe mu bice bimwe bya Nyabihu, Nyamagabe, Nyaruguru, Musanze, Ngororero, Gakenke, Rulindo, Burera, Gicumbi, Rusizi, Nyamasheke, Rutsiro na Rubavu.
Ntabwo ariko igihugu cyose kizagira ijoro rikonje. Mu bice bimwe bya Kigali, Nyagatare, Gatsibo, Kayonza na Kirehe, ndetse no mu Kibaya cya Bugarama, ubushyuhe bwo mu ijoro bushobora kuguma hagati ya 16°C na 18°C.
Ku bijyanye n’imvura, Kanama izaba iri mu mezi akomeza kurangwa n’izuba. Meteo Rwanda ivuga ko imvura izagwa muri uku kwezi izaba nke ugereranyije n’urugero rusanzwe rwa Kanama.
Mu gihugu hose, imvura iteganyijwe iri hagati ya milimetero 5 na 100, mu gihe muri Kanama ubusanzwe u Rwanda rubona imvura iri hagati ya milimetero 20 na 126.
Ibice bimwe bya Musanze, Nyabihu na Rubavu ni byo bishobora kubona imvura nyinshi kurusha ahandi, aho ishobora kugera hagati ya milimetero 80 na 100. Mu bindi bice byinshi, imvura ishobora kuba nke cyane, aho hari ahateganyijwe milimetero 5 kugeza kuri 20 gusa.
Muri uku kwezi kandi, umuyaga uteganyijwe mu bice bitandukanye by’igihugu uzaba ufite umuvuduko uri hagati ya metero 4 na 12 ku isegonda.
Umuyaga ufite umuvuduko ukomeye kurusha ahandi ushobora kugaragara mu bice bya Rusizi, Nyamasheke, Karongi, Rutsiro, Rubavu, Burera, Kirehe, Nyamagabe, Ngororero, Nyabihu, Gicumbi, Gatsibo, Ngoma, Nyagatare na Kayonza.
Mu bice bimwe by’Umujyi wa Kigali, ho hateganyijwe umuyaga woroheje ufite umuvuduko uri hagati ya metero 4 na 6 ku isegonda.
Iri teganyagihe rya Meteo Rwanda ryasohotse ku wa 31 Nyakanga, rikaba rigaragaza ko Kanama izarangwa n’izuba n’ubushyuhe butandukanye bitewe n’ahantu, mu gihe abaturage basabwa gukomeza gukurikirana amakuru mashya y’ikirere.
Inkomoko: Meteo Rwanda (amakuru y’iteganyagihe), hifashishijwe inkuru ya Igihe.com.
