UMUHOZA M. Chantal Algeria — Algeria yatangiye iminsi itatu y’icyunamo cy’igihugu nyuma y’impanuka ikomeye ya bisi yahitanye abantu 27, abandi 39 bagakomereka.
Iyi mpanuka yabaye ku wa Gatanu tariki ya 31 Nyakanga 2026, ubwo bisi yari itwaye abagenzi ivuye mu mujyi wa Sétif yerekeza mu murwa mukuru Algiers yavaga mu muhanda ikagwa mu manga mu gace ka El Karma, mu Ntara ya Boumerdès, hafi kilometero 50 uvuye Algiers.
Inzego z’ubutabazi zatangaje ko zahise zitangira ibikorwa byo gutabara no gukura abari muri iyo bisi, mu gihe inkomere zajyanwaga mu bitaro byo hafi.
Minisitiri w’Ubuzima wa Algeria, Mohamed Seddik Ait Messaoudene, yavuze ko abantu 27 bamaze kwitaba Imana, mu gihe 39 bakomeretse, barimo babiri bari bafite ibikomere bikomeye. Yanasobanuye ko umubare w’abapfuye ushobora kuba wakomeza kwiyongera bitewe n’uburemere bw’ibikomere by’abari mu bitaro.
Perezida yatangaje iminsi itatu y’icyunamo
Perezida wa Algeria, Abdelmadjid Tebboune, yatangaje iminsi itatu y’icyunamo cy’igihugu mu rwego rwo kunamira abahitanywe n’iyi mpanuka no kwifatanya n’imiryango yabo mu kababaro.
Perezida Tebboune kandi yihanganishije imiryango y’ababuze ababo, avuga ko ubutabera bugomba gukurikizwa nyuma y’uko iperereza ku cyateye impanuka rirangiye.
Kugeza ubu, impamvu yatumye iyo bisi iva mu muhanda ntiratangazwa, kuko iperereza rikomeje. Inzego z’ubutabazi n’izindi nzego bireba zakomeje ibikorwa byo gutabara no gukurikirana uko abakomeretse bameze.
Iyi mpanuka iri mu mpanuka za bisi zikomeye zabaye muri Algeria mu myaka ya vuba, ndetse yatumye igihugu gihagarika ibikorwa bimwe mu rwego rwo kwibuka no kunamira abahitanywe na yo muri iyi minsi itatu y’icyunamo.
