UMUHOZA M. Chantal Leta ya Repubulika Iharanira Demokarasi ya Congo yatangaje ko igenzura ry’ibanze ryakozwe ku bikorwa by’ikigo cya Perenco ryagaragaje ibibazo by’umwanda, mu gihe Human Rights Watch isaba ko hafatwa ingamba zo kurengera abaturage batuye hafi y’aho iki kigo gikorera.
Minisiteri ya Hydrocarbons muri RDC yatangaje ko izarangiza igenzura ryimbitse ku bikorwa bya Perenco, ikigo cy’Abafaransa n’Abongereza gicukura peteroli mu burengerazuba bw’igihugu, ndetse ikazashyira hanze raporo yaryo bitarenze mu mpera za Nzeri 2026.
Umwe mu bahagarariye Minisiteri ya Hydrocarbons yabwiye Human Rights Watch ku wa 31 Nyakanga ko ibyavuye mu igenzura ry’ibanze rya Leta byagaragaje ibibazo by’umwanda bifitanye isano n’ibikorwa bya Perenco.
Ibi bije nyuma y’uko Human Rights Watch isohoye raporo ku wa 27 Nyakanga ivuga ko ibikorwa bya Perenco mu gace ka Muanda, mu ntara ya Kongo Central, bishobora gushyira mu kaga ubuzima bw’abaturage bahatuye.
Iri shyirahamwe ryavuze ko ryasanze hari aho hakorerwa gutwika imyuka iva mu bucukuzi bwa peteroli ndetse n’imyanda, ibyo rikavuga ko bishobora kwangiza umwuka abaturage bahumeka.
HRW kandi yavuze ko yasanze peteroli yamenetse iva ku mariba no ku miyoboro ikagera mu butaka no mu migezi, bikaba bishobora kugira ingaruka ku bidukikije no ku buzima bw’abaturage. Ibi byashingiraga ku bushakashatsi bwakozwe n’iri shyirahamwe, harimo kuganira n’abaturage, abakozi b’ikigo, inzobere mu buzima n’abayobozi.
Bamwe mu baturage babwiye HRW ko bagiye bagira ibibazo birimo kubabara mu gituza no kugira isesemi, ibyo bakaba babihuza n’umwotsi uva ahatwikirwa imyanda.
Nyuma y’ibi birego, Perenco yamaganye ko ibikorwa byayo ari byo bitera umwanda n’ibibazo by’ubuzima byavuzwe, ivuga ko ifite gahunda zo gukumira umwanda no kurengera ibidukikije.
Minisiteri ya Hydrocarbons ivuga ko raporo ya nyuma y’igenzura ryayo izatanga ibisubizo birambuye, ndetse ikaba ishobora gutanga inama zijyanye no gusana ahangijwe n’umwanda no kunoza ibikorwa remezo bikenerwa mu kurengera ibidukikije.
Perenco ni cyo kigo cya mbere kandi cyonyine gikora ubucukuzi bwa peteroli muri RDC, aho ibikorwa byacyo bikorerwa cyane cyane hafi ya Muanda mu burengerazuba bw’igihugu.
Kuba Leta ya RDC iteganya gushyira hanze raporo yuzuye mu mpera za Nzeri bizatuma hakomeza gukurikiranwa niba ibibazo byagaragajwe mu igenzura ry’ibanze bizasaba ko Perenco ihindura cyangwa igakosora bimwe mu bikorwa byayo.
Human Rights Watch yasabye ko abaturage batuye hafi y’ibikorwa by’ubucukuzi bwa peteroli barindwa ingaruka z’umwanda, kandi ko amakuru ajyanye n’igenzura ry’ibidukikije ashyirwa ahagaragara kugira ngo abaturage bamenye ingaruka bashobora kuba bahura na zo.
