UMUHOZA M. Chantal Uruganda rwa peteroli rwa Dangote rwo muri Nigeria ruri gutegura gushyira imigabane yarwo ku isoko ry’imigabane muri Ukwakira 2026, mu gikorwa gishobora kuba kinini kurusha ibindi bya mbere byabaye muri Afurika.
Amakuru mashya avuga ko uru ruganda ruteganya gukusanya hafi miliyari 5 z’amadolari y’Amerika binyuze mu itangwa ry’imigabane bwa mbere ku isoko rusange, rizwi nka IPO.
Amafaranga azakusanywa azakoreshwa mu kwagura ibikorwa by’uruganda, harimo kongera ubushobozi bwo gutunganya peteroli bukava kuri barrele 650,000 ku munsi bukagera kuri miliyoni 1.4 za barrele ku munsi.
Uruganda rwa Dangote ruri i Lagos muri Nigeria rwatangiye gukora mu 2024. Rwubatswe ku ishoramari rigereranywa na miliyari 20 z’amadolari, kandi rumaze kugira uruhare rukomeye mu kongera ubushobozi bwa Nigeria bwo gutunganya peteroli imbere mu gihugu.
Iyi IPO ishobora kandi kugira akamaro ku isoko ry’imari ryo muri Afurika y’Iburasirazuba. Amakuru avuga ko Rwanda Stock Exchange, hamwe n’amasoko y’imigabane yo muri Kenya, Afurika y’Epfo, Misiri na Ghana, yamaze kugirana ibiganiro n’abajyanama ba Dangote ku bijyanye n’uruhare rw’abashoramari bo muri ibyo bihugu.
Nigeria ni yo izakira ishyirwa ku isoko ry’imigabane ry’ibanze, ariko uburyo bwateganyijwe bushobora gutuma n’abashoramari bo mu bindi bihugu bya Afurika babasha kugira uruhare muri iri shoramari.
Niba gahunda igenda uko biteganyijwe, iri shoramari rya Dangote rizaba rimwe mu bikorwa bikomeye byerekana uko amasoko y’imari yo muri Afurika ashobora kurushaho gukorana no korohereza abashoramari kubona amahirwe hirya no hino ku mugabane.
