UMUHOZA M. Chantal U Rwanda rwemeje ko ruri mu biganiro n’u Butaliyani ku mugambi wo kwakira by’agateganyo abimukira badafite ibyangombwa, mu gihe hakomeje gushakwa uburyo bwo gukemura ikibazo cy’abimukira bagerageza kugera mu Burayi.
Umuvugizi wa Guverinoma y’u Rwanda, Yolande Makolo, yavuze ko ibiganiro bikiri mu ntangiriro kandi ko kugeza ubu nta masezerano yasinwe hagati y’ibihugu byombi.
Kimwe mu bitekerezo biri kuganirwaho ni ugukoresha uburyo busa n’ubw’Ikigo cy’Ishami ry’Umuryango w’Abibumbye ryita ku Mpunzi n’u Rwanda kiri i Gashora, mu Karere ka Bugesera, cyakira by’agateganyo abimukira n’impunzi baba bavuye mu bindi bihugu.
Abantu bashobora kuzakirwa muri ubwo buryo baba bamaze kurangiza inzira z’amategeko zo gusaba ubuhungiro mu Burayi, hakazashakwa uburyo basubizwa mu bihugu bakomokamo ku bushake cyangwa bagashakirwa ahandi baba.
U Butaliyani buri mu bihugu by’u Burayi biri gushaka uburyo bwo kwihutisha isubizwa ry’abimukira badafite uburenganzira bwo kuguma ku mugabane w’u Burayi. U Rwanda rwo ruvuga ko ibiganiro nk’ibi bishobora kugira uruhare mu gushakira ibisubizo ikibazo cy’abimukira batinya ingendo ziteje akaga banyura muri Sahara no ku Nyanja ya Méditerranée.
Nubwo ibiganiro bikomeje, kugeza ubu nta masezerano hagati y’u Rwanda n’u Butaliyani yamaze gusinywa, kandi nta mubare w’abimukira bazazanwa mu Rwanda wemejwe.
