UMUHOZA M. Chantal U Rwanda na Repubulika Iharanira Demokarasi ya Congo (RDC) byakomeje ibiganiro bigamije gushyira mu bikorwa amasezerano y’amahoro ya Washington.
Ibi byatangajwe nyuma y’inama ya gatandatu ya Joint Security Coordination Mechanism (JSCM) yabereye i Geneva ku wa 12 na 13 Kanama 2026.
Iyo nama yahuje u Rwanda, RDC, Leta Zunze Ubumwe za Amerika, Qatar, Togo n’Umuryango wa Afurika Yunze Ubumwe.
Impande zitabiriye inama zemeranyije guteza imbere ingamba ebyiri nshya zo gukurikirana ishyirwa mu bikorwa ry’amasezerano ya Washington.
RDC kandi yagaragaje gahunda yayo yo kwambura intwaro no gusubiza mu buzima busanzwe abarwanyi ba FDLR.
Abitabiriye inama baganiriye kuri iyo gahunda ndetse banungurana ibitekerezo n’abahagarariye MONUSCO ku bijyanye no kwambura intwaro imitwe yitwaje intwaro.
Impande zombi kandi ziteganya gukora inama y’impande eshatu mu Kwakira 2026, mu rwego rwo gukomeza ibikorwa byo gushyira mu bikorwa amasezerano y’amahoro.
Inama ya karindwi ya JSCM iteganyijwe kubera i Geneva ku wa 16 na 17 Nzeri 2026.
Ibiganiro bikomeje mu gihe u Rwanda, RDC n’abafatanyabikorwa babo bakomeje gushaka uburyo bwo guteza imbere amahoro n’umutekano mu karere k’Ibiyaga Bigari.
