UMUHOZA M. Chantal Uganda yifatanyije na Kenya mu kwamagana icyemezo cy’u Rwanda cyo guhagarika no gukura ku isoko zimwe mu nzoga zikorerwa muri ibyo bihugu, ivuga ko izo nzoga zifite ibyemezo by’ubuziranenge bihuje n’ibipimo by’Umuryango wa Afurika y’Iburasirazuba (EAC).
Ikigo cya Uganda gishinzwe Ubuziranenge (UNBS) cyavuze ko inzoga 10 za Uganda zahagaritswe mu Rwanda zifite ibyemezo byemewe kandi zujuje ibipimo bihuriweho na EAC.
UNBS yavuze kandi ko mu nama y’impande z’ibihugu bya EAC yabaye ku wa 10 Kanama, nta mpamvu ya tekiniki cyangwa ishingiye ku bumenyi yatanzwe yo gukomeza guhagarika izo nzoga.
Iki kibazo cyatangiye nyuma y’aho Rwanda FDA ku wa 5 Kanama ihagaritse inzoga nyinshi zitumizwa mu Rwanda, zirimo izaturukaga muri Uganda na Kenya, inasaba abacuruzi kuzisubiza abatumiza ibicuruzwa.
Kenya na yo yari yamaganye icyo cyemezo, ivuga ko inzoga zayo zahagaritswe zari zarakorewe igenzura kandi zigakomeza kuba zujuje ibipimo by’ubuziranenge.
UNBS ivuga ko ikibazo gifite n’ingaruka ku bucuruzi bw’akarere, kuko ibicuruzwa byahawe ikimenyetso cy’ubuziranenge cya EAC bikwiye kuba byemerewe kugenda mu bihugu bigize uyu muryango.
Iki kibazo cyatumye impande zombi zishingira ku mategeko agenga ubucuruzi n’ubuziranenge muri EAC, mu gihe u Rwanda rwo ruvuga ko ingamba zarwo zigamije kurinda ubuzima rusange no gukumira ibicuruzwa bitujuje ibisabwa.
