UMUHOZA M. Chantal Guverinoma ya Uganda yatangiye gahunda yo guteza imbere inganda zitunganya amagi n’ibiribwa by’abana.
Iyi gahunda igamije kongera agaciro k’umusaruro w’abahinzi no kugabanya ibicuruzwa Uganda itumiza mu mahanga.
Minisitiri wungirije ushinzwe Inganda, David Bahati, yasuye uruganda rwa Pristine Foods Limited, asuzuma uburyo bwo kongera umusaruro w’ibikomoka ku magi.
Bahati yavuze ko Uganda ishobora kugabanya amafaranga isohora mu mahanga itumiza ibicuruzwa bikomoka ku magi.
Yatanze urugero rwa mayonnaise, avuga ko Uganda itumiza hanze iyifite agaciro ka miliyoni 30 z’amadolari buri mwaka.
Guverinoma kandi irashaka ko amagi arushaho gukoreshwa mu mafunguro ahabwa abanyeshuri, mu rwego rwo gufasha kurwanya imirire mibi.
Pristine Foods itunganya amagi ikayavamo ibicuruzwa birimo ifu y’amagi, mayonnaise n’amagi atunganyijwe.
Guverinoma ivuga ko guteza imbere uru rwego bishobora gufasha abahinzi kubona isoko ry’umusaruro wabo, ndetse bigatanga n’akazi.
