UMUHOZA M. Chantal Perezida Paul Kagame yavuze ko ubuzima bwo mu buhungiro yabayemo akiri muto bwagize uruhare mu kumubera isomo ku bijyanye no guharanira igihugu Abanyarwanda bashobora kubamo batekanye kandi bafite icyizere cy’ahazaza.
Ibi yabivuze ku wa 25 Kanama 2026 mu kiganiro cyabereye i Kigali mu nama ya Africa Mindset Reset Forum, yateguwe na African School of Governance (ASG). “ChimpReports” (https://reference-url-citation.invalid/0)
Kagame yavuze ko yagiye mu buhungiro muri Uganda afite imyaka ine, akaba ari ho yamaze igice kinini cy’ubwana bwe.
Yasobanuye ko kuba impunzi byamweretse ingorane umuntu ashobora guhura na zo iyo atagira igihugu ashobora kwitaho no kubamo mu mutekano.
Yavuze ko ku Banyarwanda bari baragiye mu buhungiro, ikibazo kitari ugushaka aho baba gusa, ahubwo cyari no kugira icyizere cy’uko umunsi umwe bazashobora gusubira mu gihugu cyabo.
Perezida Kagame yanagarutse ku mateka y’umuryango we, avuga ko wahunze u Rwanda mu gihe cy’imvururu zatangiye mu myaka ya 1960. Yavuze ko bamwe mu bo mu muryango we batashoboye guhunga ndetse bakicwa.
Kuri we, ibyo byabaye igice cy’amateka yagize uruhare mu kumwubakamo imyumvire yo kurwanya ubuzima bwo kuba impunzi no gushaka ibisubizo birambye ku kibazo cy’Abanyarwanda bari barahunze.
Yavuze kandi ko Jenoside yakorewe Abatutsi mu 1994 itatangiye ari ibintu bitunguranye, ahubwo ko yari ikurikije amateka maremare y’ivangura n’urugomo byari byaratangiye mbere.
Kagame yashimangiye ko amasomo akomeye u Rwanda rwanyuzemo akwiye gufasha Abanyarwanda kubaka igihugu kirinda ko ayo mateka asubira.
Inkomoko: ChimpReports
