Fabrice Nahimana Kuri uyu wa Mbere, itariki ya 20 Nyakanga, abasirikare mirongo inani bo mu Ngabo za Repubulika ya Demokarasi ya Congo (FARDC), batangiye imyitozo y’iminsi 45 i Beni, muri Kivu y’Amajyaruguru, yibanda ku ntambara yo mu ishyamba no kubahiriza amategeko mpuzamahanga arengera ikiremwamuntu.
Iyi myitozo iri gutangwa n’abarimu ba gisirikare bo muri Brazil babarizwa muri MONUSCO, igamije kongerera ubushobozi bw’imirwanire ingabo za leta mu kurwanya inyeshyamba za ADF mu gihe hashyirwa imbere amahame yo kurinda abaturage mu gihe cy’ibikorwa.
Ingabo ziri guhabwa imyitozo zibarizwa muri Batayo ya 1303 ya FARDC, ingabo ziri ku rugamba mu gice cya Grand Nord, cyane cyane mu mihanda ihuza Beni, Butembo na Lubero.
Kongera ubushobozi bwo kurwana no gusobanukirwa neza amabwiriza agenga imirwano
Gahunda y’aya mahugurwa ihuza imyitozo ngiro ikorerwa mu ishyamba n’inyigisho zo mu ishuri. Intego nyamukuru ni uguhindura imyitwarire n’ingamba za gisirikare kugira ngo bihuze n’uburyo umutwe wa ADF ukora. Uyu mutwe ukoresha amashyamba y’inzitane ya Beni na Lubero mu gushinga ibirindiro no gutegura ibitero byibasira abaturage bo muri ako gace.
