UMUHOZA M. Chantal Umupadiri wo muri Ghana yasabye abakora mu itangazamakuru gukoresha umwuga wabo mu kubaka amahoro no guharanira ubumwe, aho gukwirakwiza ubutumwa bushobora guteza amacakubiri.
Ibi yabivugiye mu Rwanda nyuma yo gusura Urwibutso rwa Jenoside rwa Kigali, mu gihe hakomeje inama mpuzamahanga ya SIGNIS World Congress iri kubera i Kigali.
Uyu mupadiri yavuze ko gusura urwibutso byamufashije kurushaho gusobanukirwa ingaruka z’ubutumwa bw’urwango n’amacakubiri bushobora kugira ku muryango.
Yagaragaje ko itangazamakuru rifite uruhare rukomeye mu kubaka umuryango urangwa n’amahoro, cyane cyane mu gihe cy’ikoranabuhanga rituma amakuru agera ku bantu benshi mu gihe gito.
Yasabye abanyamakuru n’abandi bakora mu itumanaho kwitondera ibyo batangaza, bakirinda ubutumwa bushobora kubiba urwango cyangwa amacakubiri.
Inama ya SIGNIS World Congress iri kubera i Kigali yahuje abanyamakuru, abakora mu itumanaho n’abandi banyamwuga baturutse mu bice bitandukanye by’Isi.
Iyi nama yibanze ku ruhare rw’itangazamakuru n’itumanaho mu guteza imbere amahoro, ukuri n’ubutabera.
Uruzinduko ku rwibutso rwa Jenoside rwa Kigali rwabaye kimwe mu bikorwa byafashije abitabiriye inama gusobanukirwa amateka y’u Rwanda n’akamaro ko gukoresha itangazamakuru mu buryo bubaka aho gusenya.
