UMUHOZA M. Chantal Ikigo cy’indege cya Kenya Airways cyatangaje ko amafaranga gikoresha mu kugura lisansi y’indege yazamutseho 72% mu gice cya mbere cy’umwaka wa 2026.
Iki kigo kivuga ko izamuka ry’ibiciro bya lisansi ryatewe ahanini n’amakimbirane akomeje mu Burasirazuba bwo Hagati, yagize ingaruka ku itangwa ry’ibikomoka kuri peteroli.
Kenya Airways kandi yavuze ko ayo makimbirane yateje ibindi bibazo mu mikorere yayo.
Kugera kw’ibikoresho by’indege birimo ibyuma bisimbura ibyangiritse byatinze, ndetse no gusana zimwe mu ndege byahungabanyijwe n’izo mpinduka mu itangwa ry’ibikoresho.
Ibi bishobora gukomeza gushyira igitutu ku kiguzi cyo gutwara abagenzi, mu gihe ibigo by’indege bikomeje guhangana n’izamuka ry’ibiciro by’ingufu.
Kenya Airways yavuze ko iri gukurikirana uko ibintu bihagaze no gushaka uburyo yagabanya ingaruka z’izamuka ry’ibiciro n’ihungabana ry’ibitangwa ku isoko.
Iri zamuka rije mu gihe ibiciro bya peteroli ku isi na byo bikomeje kuzamuka bitewe n’ihungabana ry’ubwikorezi mu Nyanja ya Hormuz, imwe mu nzira zikomeye isi ikoresha mu gutwara peteroli.
