UMUHOZA M. Chantal Rwanda yahagaritse by’agateganyo iyinjizwa n’icuruzwa ry’ibinyobwa bisindisha 11 bikorerwa muri Uganda, inategeka ko bikurwa ku isoko, mu rwego rwo kurengera ubuzima bw’abaturage.
Ikigo cy’Igihugu gishinzwe Ubugenzuzi bw’Ibiribwa n’Imiti (Rwanda FDA) cyafashe iki cyemezo mu gihe Leta y’u Rwanda ikomeje ingamba zo gukumira ibinyobwa bisindisha bitujuje ubuziranenge no kurwanya ikoreshwa ry’inzoga zishobora guteza ibibazo ku buzima.
Muri ibyo bicuruzwa harimo Bond 7 Whisky, Campfire Gin, Club 5 Gin, Tembo Liqueur, X5 Gin, Jonney’s Gin, X5 Liqueur, Pan Master Whisky, X5 Whisky, Gilbey’s Flavoured Gin na V&A Imported Cream Liqueur. Bimwe muri byo bikorerwa na Uganda Breweries Limited, mu gihe ibindi bikorerwa n’andi masosiyete yo muri Uganda.
Rwanda FDA yategetse abatumiza, abacuruza n’abakwirakwiza ibyo binyobwa guhagarika kubigurisha no kubikura ku isoko. Ababishinzwe basabwe kandi gutanga raporo y’uko ibyo bicuruzwa byasubijwe mu gihe cy’iminsi itatu y’akazi.
Izi nzoga zo muri Uganda ziri mu bicuruzwa 52 by’inzoga bituruka mu bihugu bitandatu Rwanda FDA yahagaritse by’agateganyo. Ibyo bihugu birimo Uganda, Tanzania, Kenya, Burundi, u Buhinde na Poland.
Rwanda FDA yavuze ko iki cyemezo gifashwe mu rwego rwo kurengera ubuzima rusange, mu gihe u Rwanda rukomeje ibikorwa byo kugenzura no gukuraho ku isoko ibinyobwa bisindisha bidahuye n’ibipimo byagenwe.
Iki cyemezo gikurikiye ibindi byafashwe mu minsi ishize, birimo gufunga inganda zikora inzoga zitujuje ubuziranenge no gutegeka ko ibicuruzwa byazo bisubizwa ku isoko. Rwanda FDA yatangaje kandi ko ibikorwa by’ubugenzuzi bizakomeza.
