UMUHOZA M. Chantal Umwangavu w’imyaka 14 yishe abantu barindwi muri Thailand, mbere yo kwiyahura.
Abapolisi bavuze ko uyu mwana yabanje kwica sekuru na nyirakuru mu rugo rwabo.Nyuma yaho, yagiye ku ishuri rya Debsirin Nonthaburi, hafi y’umurwa mukuru Bangkok.
Agezeyo, yarashe abarimu n’abandi bakozi batanu b’ishuri. Byongeye kandi, abantu 23 bakomeretse muri icyo gitero.
Polisi yavuze ko uyu mwangavu yakoresheje imbunda yari iya sekuru.Yarashishije amasasu nibura 26. Nyuma yaho, yararashe mu mutwe, ahita agwa hasi.
Abatabazi bamusanze agifite ubuzima. Bamuhaye ubutabazi bw’ibanze, ariko nyuma yaje gupfa.
Ibi byabereye ku ishuri ryigamo abanyeshuri barenga 3,100. Rifite kandi abarimu n’abandi bakozi 147.
Umwe mu banyeshuri yabwiye Reuters ko yabanje gutekereza ko urusaku yumvaga ari urw’ibishashi cyangwa ikindi kintu. Ariko, nyuma yaje kumenya ko ari amasasu.
Minisitiri w’Intebe wa Thailand, Anutin Charnvirakul, yavuze ko uyu mwangavu ashobora kuba yari afite ibibazo by’umuhangayiko bijyanye n’amasomo.
Hagati aho, Minisitiri w’Intebe yavuze ko Leta ishaka gushyiraho amategeko akaze kurushaho agenga gutunga imbunda.
Iki ni cyo gitero cyahitanye abantu benshi muri Thailand kuva mu 2022.
Nanone, ni ubwa kabiri ishuri ryo muri Thailand ribaye ahantu habera iraswa muri uyu mwaka. Mu kwezi kwa Gashyantare, umwarimu umwe yarishwe, naho umunyeshuri umwe arakomereka mu kindi gitero.
